- مراسيل تاني يـَ سديم أنتِ مبتحرميش!!
- آخر مَرة آخر مَرة بجد مش هاخد مِنه تاني وهسبهم مكانهم
أنا بكدب أنا بحب مراسيله جدًا كل يوم بلاقي مِرسال قدام باب البيت وأسمي عليه هو ميعرفش إني بعشق الحاجات دى!!
هو فاكر إني معرفش هو مين، بس لا هو أبو غمازات اللي شوفته مَرة مِن البلكون. بيحطهم، بيتنا قدامه جنينة لطيفة كده كل يوم بلاقي مرسال فيها
حبيته مِن مراسيله بس هو ليه مش بيعترف؟!
أبعتلي سلام قول أي كلام مِن قلبك أو مِن ورا قلبك..")
- مِش يبقي حرام أسهر وتنام وتفوتني أقاسي نار حُبك.. أحم ممكن نعناع!!
وأخيرًا أتكلم يااا كنت فاقدة الأمل أنه يتكلم، هو جاري ولايق عليه جاري يا جاري يا حتة سكرة كده من حلاوته، بلكونته جنب بلكونة أوضتي، طب مش هنشغل بنت الجيران بقا وكده!!
طلع بيشرب شاي بنعناع زيي وبيحب عبد الحليم، أديته نعناع مِن زرعتي ووقف يسمع عبد الحليم معايا.
كان كل اللي بينا نظرات مش أكتر وإبتسامة مع كلمات عبد الحليم وهو بيقول:-
( أنا لك علىٰ طول خليك ليا...
يمكن فتىٰ أحلامي واقف قدامي وأنا معرفش هه!!
- مِعلَقة نفسِك بوهم أفرضي خاطب
- طنط سهير جارتنا سألته وقالت أنه مش خاطب
- وبعدين؟
- جانا الهوىٰ جانا وجالي وخبط علىٰ بابي كده
- وهتفتحي!
- لما قلبي يطمن للهوىٰ
سمر دايمًا كده مِكسرة سقف طموحاتي بس هو إعجاب صغنون كده أماال
بس هو لايق عليه الأسمراني اللي مدوخني أوي بعنيه العسلي وسماره دا يا ربي، رمانا الهوىٰ فعلًا.
هييح يعني حاجة في حب عبد الحليم النسخة الجديدة اللي واقفة قدامي، يا ترىٰ لو لبس بدلة هيبقى شكله عامل إزاي
- لولولوليي
- مين هيتجوز؟
- سلمى بنت طنط سهيرحددوا الفرح وعزمت كل العمارة
- كلها كلها يا ماما؟
- آه
- لولولييي
فرحت لا فعلا الله يا ترىٰ هيجي وأشوفه ببدلة وكده هيطلع حلو عن ما هو فيه!!
لبست الفستان اللي بحبه الكحلي والكوتشي الأبيض، ومحطتش ميكب حطيت حكل بس.
- اش اش اش أي يا بت الشياكة دي
- أحسديني يا سمر أنا ناقصاكي
- غوري يا به أنتِ أصلًا كُلك علىٰ بعضك كده متزوقة عشان سي زياد دا مش أكتر
- هو جاي!!
- آه شوفته لابس بدلة شيك كده ونازل علىٰ تحت وأقولك المفاجأة
- أي ها ها!!
- البدلة كحلي
يا محاسن الصدف، كحلي وانا لابسة كحلي!!
يحسبني بقلده ولا حاجه لااا أغيره
- تغيري أي يما خلاص الناس مشيت وأمك مخلصة أنجري قدامي يلا
شدتني من أيدي ونزلنا تحت، الفرح كان في قاعة الأفراح اللي بعد البيت بشارعين ودى حاجه حلوة تقريبًا كل العمارة كان ماشية مع بعض إلا هو كان ماشي لوحده
- ماما ماما..
- نعم!
- شايفة كله ماشي مع بعض إلا أستاذ زياد اللي هناك دا
بصتلي بجنب عينها وهوب لقيتها بتناديه، لا أنا مظبطتش نفسي لااا كده يا ست الكل كده يا أمومة، يا ترىٰ هو عارف أن أنا بحبه زي ما أنا عارفة أنه هو بيحبني!!
- إزيك يا زياد يا أبني عامل أي؟
- الحمد لله يا أمي
- ماشي لوحدك ليه، هما شارعين تعالى أمشي معانا
تقريبًا ماما عرفت تفاصيل حياته، وأنا كنت بستمع بس عامله نفسي مش واخده بالي أهله متوفين وهو وصاحبه فاتحين معرض عربيات، هممم بفكر أشتري عربية تاخد كام سنين كده لحد ما أحوش تمنها!!
أنا بقول نركن العربية علىٰ جنب، عايش لوحده وبيحب النعناع اللي بنزرعه في بلكونتي ثانية أي!!
- خلاص لو حبيت تشرب شاي بنعناع أطلب من سديم هتديك
- ماما دى نعناعتي
- بس يا بت
- يا ماما !!
هي نبع الحنان بتصدرني ليه!! نفسي أسأله هو فعلًا بيحبني!! ولا دي مراسيل أي بالظبط؟!
أصله أسمي وتفاصيل عيوني وطريقتي في الكلام بتتوصف في المراسيل يا ترىٰ يا زياد بتحبني!!
وصلنا الفرح وهيي هيصة ودوشه وأنا أصلًا بكره الدوشه أنا بس روحت عشان هو رايح، صدعت بعد عشر دقايق واستأذنت إني هطلع أشم هوا
- شكلك مش بتحبي الأفراح
- تؤ مش بحب الدوشة
كان جاي ورايا وحاطت أيده في جيب البنطلون الجينز!! بدلة علىٰ جينز وكوتشي أبيض والله فارس أحلامي أنتم مش مصدقين
- شكلنا مطقمين
- بتحب الكحلي!!
- أي درجة من الأزرق بحبها
- وه أنتَ شبهي جدًا، بتحب عبد الحليم وبتحب الشاي بنعناع وبتحب الأزرق يكشي تكون بتحب الشتا كمان!!
ضحِك - بحب الشتا كمان
- علىٰ فكرة أنا عارفة
- عارفة أي؟
- عارفة أنـ....
سمعنا صوت من بعيد بينادي عليا
- سديم
روحتلها وأنا ببرطم
- سمر أنتِ عارفة حاجه، أنتِ أكتر أخت فصيلة في العالم
- ماما عايزاكِ أنا مالي
هزيت راسي وروحت معاها وأنا ماشية لفيت وشي ليه لقيته بيبصلي ويبتسم أبتسمت ومشيت..
سمر أختي متجوزة وبتجيلنا زيارات وفي يوم سمعت ماما بتزرغت تاني
- أي يا ماما مين هيتجوز تاني؟
- سمر أختك حامل
- أحلفي الله هبقي خالة اعاااا
ماما عملت حلويات ووزعت علىٰ العمارة كلها وجه دور اللي في بالي فـَ قررت شئ كدهوهو إني هحط مرسال كاتباه بأيدي وحطيته تحت طبق الحلويات في اللفة كدة وبعدين خبطت خبطتين علىٰ الباب فـَ طلع بعد شويه
- صباح الخير
- صباحك سعيد
- سعيد بوجودك
- أي؟
- أي!!
حمحمت وابتسمت
- أتفضل يا أستاذ زياد الحلويات دى ماما عاملاها بمناسبة حمل أختي سمر.
أول ما أخدها جريت من قدامه قبل ما يشوف وشي اللي أتقلب طماطم
- ممكن نعناع!!
- احم أكيد
- أنا عرفت أنتِ عارفة أي
- طب كويس أن أنتَ عرفت أنا عارفة أي هه
- طيب ممكن تبلغي والدتك إني جايلكم بكرة
بصتله وأنا عيني لمعت
- دا إعتراف منك أن أنتَ اللي بتبعتلي المراسيل
- إعتراف رسمي فهمي نظمي
- طب مش هتاخد نعناع!!
تاني يوم طلب أيدي من ماما وتمت بحمد الله خطوبتي يا جدعان
#هايدي_إبراهيم
#سديم
ليست هناك تعليقات:
إرسال تعليق